ڈاکٹر اسرار احمدؒ کی شخصیت کسی تعارف کی محتاج نہیں ہے۔ آپ نے درج بالا آٹھ شخصیات سے کسبِ فیض کیا اور ہمیشہ اُسے بیان بھی کیا۔ ڈاکٹر صاحبؒ کا کہنا تھا کہ ایسا نہیں ہے کہ ان آٹھوں شخصیات کی ہر بات سے مجھے کامل اتفاق ہو بلکہ حقیقت یہ ہے کہ میں نے اِن سب حضرات سے بہت کچھ سیکھا ہے لیکن کہیں کہیں ان سے اختلاف بھی ہے۔ اسلام کا انقلابی فکر ہو یا حقیقتِ ایمان کی اعلیٰ سطح کی علمی بحثیں، فرائضِ دینی کا جامع تصور ہو یا جماعت سازی کے مشکل مراحل، قرآنِ مجید کے ساتھ محبت اور اُس کا پڑھنا پڑھانا ہو یا اس کے مضامین اور نظمِ قرآن اور تدبّرِ قرآن کے مختلف پہلو، اِن تمام علوم ومسائل و معاملات کی بنیادی تعلیم ڈاکٹر صاحبؒ نے انہیں آٹھوں شخصیات ہی سے بالواسطہ اور بِلا واسطہ حاصل کی۔ تفسیرِ عثمانی کے متعلق ڈاکٹر صاحبؒ فرمایا کرتے تھےکہ "اِس کے ذریعے میں اسلاف کے ساتھ چمٹا ہوا ہوں۔" جبھی ہم دیکھتے ہیں کہ ڈاکٹر صاحب نے دروسِ قرآن کا سلسلہ ہو یا رمضان المبارک کی راتوں میں دورۂ قرآ ن ہو، ہمیشہ تفسیرِ عثمانی ہی کے ذریعے اِس خدمت کو انجام دیا۔ ہماری رائے میں ڈاکٹر صاحبؒ کی اُن خدماتِ دینی کا تذکرۃ بہت ضروری ہے جن پر آپ نے منظم انداز میں کام کیا:

• دعوت و تحریک رجوع الی القرآن۔ یعنی قرآن کا پڑھنا اور پڑھانا۔ قرآن کورسز کرانا وغیرۃ
• حکمتِ ایمان اور فلسفے سے متعلق اعلیٰ علمی سطح کے مسائل کو وقت کی اعلیٰ علمی سطح کے مطابق پیش کرنا
• عہدِ حاضر کے باطل فلسفوں اور الحاد و مادّہ پرستی سے لیس نظریات میں خُذ مَا صَفَا دَع مَا کَدَر کے اصول پر چلتے ہوئے علمِ کلام میں اپنا حصّہ ڈالنا۔
• اسلام کے سیاسی، معاشی اور سماجی نظام یعنی اسلام کے انقلابی فکر یا اسلام کے عمرانی فکر کو پیش کرنا
• مسلمانوں پر اللہ تعالیٰ کی جانب سے عائد کردہ فرائض کا صحیح ادراک و شعور اور اُن کی مسلسل دعوت و تبلیغ کرنا۔
• نکاح اور شادی بیادہ سے متعلق اسلام کی تعلیمات کو بڑے پیمانے پر عام کرنا
• تحریکی زندگی کے پیچ و خم اور اتار چڑھاؤ کو قرآن وسنت کی بنیاد پر دلائل کے ساتھ واضح کرنا
• ملک و قوم کو مشکلات اور مسائل سے نکلنے کیلئے عوام اور حکمرانوں کو مشورے دینا
• امتِ مسلمہ کی زبوں حالی سے نکلنے کی قرآنی راہ تجویز کرنا اور اُسے دلائل و براہین سے مزیّن کر کے واضح کرنا۔
• ملکی، علاقائی اور بین الاقوامی سطح پر بدلتی سیاسی صورتحال کے پیشِ نظر مستقبل کی پیش بندی کرنے کی طرف توجہ مبذول کروانا اور مستقبل میں اسلام کی نشاۃِ ثانیہ کیلئے ممکنات اور خطرات و خدشات پر بات کرنا۔ نیز یہ کہ یہودی عالمی ایجنڈے کو بے نقاب کرنا